que conmigo andan lazrados, ¡e non vos lo dare!
Prendiendo de vos e de otros ir nos hemos pagando;
abremos esta vida mientra plogiere al Padre santo,
commo que ira a de rey e de tierra es echado."

Alegre es el conde e pidio agua a las manos,
e tienen gelo delant e dieron gelo privado.
Con los cavalleros que el Çid le avie dados
comiendo va el conde ¡Dios, que de buen grado!

Sobr’el sedie el que en buen ora nasco:
"Si bien non comedes, conde, don yo sea pagado
aqui feremos la morada, no nos partiremos amos."

Aqui dixo el conde: "¡De voluntad e de grado!"
Con estos dos cavalieros a priessa va yantando;
pagado es mio Çid que lo esta aguardando
por que el conde don Remont tan bien bolvie las manos.

"Si vos ploguiere, mio Çid, de ir somos guisados;
mandad nos dar las bestias e cavalgaremos privado.
Del dia que fue conde non yante tan de buen grado,
el sabor que dend e non sera olbidado."

Dan le tres palafres muy bien ensellados
e buenas vestiduras de peliçones e de mantos.
El conde don Remont entre los dos es entrado;
fata cabo del albergada escurriolos el Castelano:

"¡Hya vos ides, conde, a guisa de muy franco!
¡En grado vos lo tengo lo que me avedes dexado!
Si vos viniere emiente que quisieredes vengalo
si me vinieredes buscar fallar me podredes;
e si non, mandedes buscar; o me dexaredes
de lo vuestro o de lo mio levaredes algo."

"¡Folgedes, ya mio Çid, sodes en vuestro salvo!
Pagado vos he por todo aqueste año,
de venir vos buscar sol non sera penssado."

63

Aguijava el conde e penssava de andar;
tornando va la cabeça e catandos atras,
miedo iva aviendo que mio Çid se repintra,
lo que non ferie el caboso por quanto en el mundo ha
¿una deslealtança? ca non la fizo alguandre.
Hido es el conde, tornos el de Bivar;
juntos con sus mesnadas, conpeçolas de legar
de la ganançia que an fecha maravillosa e grand.

Related posts

• Джордж Оруэлл. Рубеж. George Orwell. La marca (0)
• Джордж Оруэлл. Восстание на ферме. George Orwell. Rebelión de la granja (0)
• Джордж Оруэлл. 1984 год. George Orwell. 1984 (0)
• Доминго Фаустино Сармьенто. Факундо. Domingo Faustino Sarmiento. Facundo (0)
• Доминго Фаустино Сармьенто. Плутоград. Domingo Faustino Sarmiento. Argirópolis (0)

Pages: 1 2 3 4 5 6 7